مکان : تبریز- خیابان امام خمینی (ره) - جنب موزه آذربایجان - فرهنگسرای خاقانی

زمان : 22 لغایت 29 بهمن ماه 1390

ساعات بازدید : صبح ها 8:30 الی 13 و  عصرها  15 الی 18

دیشی بیر کاتوبلپاس*

بو گون ارگن لییینین سون نوقطه سی

هله یوکسک لره وارماق اوچون آیاقلاری لازیم

اؤزونو دویورماغا

اورییندن باشلاییر...

تئل- تئل عصب لری

هؤرومجک تورو توخویور گؤوده سینه

دامار- دامار

ایچین- ایچین ایچینی یئییر

شافاق آچیلدیقدا

اؤز گؤزلریندن ایشیق ایچه جک

سونسوز گئجه لره واریب

اؤز قارانلیغینا جوماجاق

دیشی بیر کاتوبلپاس

دیش قیجیردیب اؤزونه.... 

کاتو بلپاس:اسطوره ای بیر یارادیق. اؤزونو دویورماق اوچون اؤزوندن تغذیه ائیلر. آیاقلاریندان باشلاییر اؤزونو یئمه یه.

90/10/29

14 yanvar bakıda əli –nino ədəbi kafesində iki şaır və iki yazarın kitab təqdımatı oldu.  Şaırlər: ülker ucqar, turkan urmulu

Yazarlar: fars romançı mustafa məstur ve ruqəyyə kəbiri

Təssüflə təqdimata qatıla bilmədim,ama elə ancaq uzaqdan qanun nəşriyatina özəlliklə hörmətli şahbaz xuduoglu və redaktor pərviz cəbrayıla təşəkkürlərimi bildirirəm.  Ruqəyyə kəbiri

14 یانوار باکی دا علی نینو ادبی کافه سینده ایکی شاعیر و ایکی یازارین کیتاب تقدیماتی مراسیمی اولدو.

شاعیرلر: اولکر اوجقار- تورکان اورمولو

یازارلار: قارسجا رومان یازاری مصطفی مستور و رقیه کبیری

تعسوفله تقدیماتا قاتیلا بیلمه دیم. آنجاق اوزاقدان قانون نشریاتینا، اؤزللیکله حورمتلی شاهباز خوداوغلی و رئداکتور پرویز جبرائیله تشکورلریمی بیلدیرییرم.      

رقیه کبیری

هئچ کیم خانیم!

قارالاییرام قار کاغیذلاری...

یئنی دن چئوریلیرم حیکایه مین کاراکترینه

قار ایسه،دوشونجه ام کیمی

کوله یین بوینوندا آت چاپیر

تبریز، توف هه توف دور بو گون...

اوتاغیمدا اکسیژن بیتیب

آیاق دؤیورم کوله یین گؤبیینده

گؤزلویومده،

تومورجوقسوز، قار چیچکلری گؤیه ریر

زوغ آتیر ساچیما

کؤک سالیر جانیما

سن سیز لییی،

سئوگی سیزلییی دونورام بوز کیمی

قار آدامی اولورام کوچه نین اورتالیغیندا

توپا باغلانیرام

اوشاقلارین اووجلاریندا کی باریش گول­له لری ایله...

کولک میزیلدانیر هاوادا

زیل سسی ایله شارقیسینی...

قارقالارین بم سسینی اؤزله ییرم

قار...قار...قار...

حیکایه مین کاراکتری ام

اورییم آغرییر

بورولورام کوله یین گؤبیینده

سس سیز- سمیرسیز

 ایتیرم کوله یین قوجاغیندا

" هئچ کیم خانیم"* اولورام

تبریزین توف هه توفونده....

90/10/23

* هئچ کیم خانیم: رقیه کبیری دن بیر حیکایه -قارادابان قیز بلوقوندا اوخویا بیلرسیز.

یاریم یوز ایلیمه آچیلان صاباحا.... 

سنین کیمی بیری­ ام

ات­دن، دری­دن، سوموک­دن

یالنیز

سنی اؤزله­ ینده پورنو فیلیمی ایزله­ میرم

یوخوم، بیر سئرچه­ کیمی

یاتاغیمدان پیر- پیر قانادلانیب اوچوشاندا 

سیقارا اوفله میرم....

سنین کیمی سئویرم

آنجاق، اؤفکه­ دن بویلو قالمیرام

نفرت دوغا بیلمیرم...

سنین کیمی یاشاییرام

ایش­سیزلیقدن، پاراسیزلیقدان قورخورام

دوارلارا دالدالانیرام

سئوگیمی جزالاندیریرام

گونلریم قول- قولا دولاشیر

گئجه­ لریم­سه، کؤلگه ­لرله اوغراشیر

اؤلولر له دانیشیر...اؤپوشور...سئویشیر...

سندن خبرسیز، صاباح یاریم یوز ایلیم

سحریمه گؤز آچاجاق

چن کیمی، بولود کیمی اؤتوب، کئچیب...

بیر گون،

آدسیز بیر آد کیمی  هارالاردا قویلاناجاق!

اینان!

تام سنین کیمی بیری ام

یالنیز، سنین کیمی یاشامی اؤزله­ میرم

قوشلارین کؤچن مؤسومونده

قانادلانا بیلمیرم

آنجاق،

بایقوش اولوب، قونورام یاسدیغیما....

۹۰/۱۰/۱۰

گل!

قوجاغیم« سئوگیسیزلییین اوشاق آناسی»

قیش ایلا برابر

ایچیمده کی شیلتاق قیزین ارکؤیونلویونه گل...!

گلیرسن،

بیر اسکیمو دامچاسی تیکرم

کورسو قورارام قار یورقانینین آلتیندا

ساپا دوزولموش نار دنه لری

اللرینده کی یاقوت بویون باغینی گزدیر بویون بوغازیمدا ...

بیر دادیملیق ساخسی حالوا

شاه دانا، قووورقا، اییده قابیغی قیزارار یاناقلاریمدا!

گل...!

قیش ایلا آستا- آستا چیلله نین اوره ییندن

یالنیزلیغیما،

دونوموش دویغولاریما گل....

۹۰/۹/۳۰

گیلک دیلینه چئویریلن بیر شعریم

 سایین م. ووقاردان زحمت لری اوچون تشکور ائدیرم .

آل یازیسی

 ائرته­ دن،

شافاق قارلی دولانباجلارا توخونمادان

کور فالچی آچدی سحرین فالینی

قوشا دوشمه ین شیش لر

فالچی نین تاسیندا یوخ،

پیرتلاشدی تبریزین تئلینین کیلکه سینه...

آلین یازی دئییلدی، الده یازیلمیش آل یازیسی ایدی

آنامین سورمه لی گؤزلری

کیتابلارین یانیق قوخوسونا قاماشسین

دوواغینی آتامین اللری یوخ،

دامو اودو قاپسین!

آتام،

آنامین آل قیرمیزی بئل باغیندان آسیلسین

بابام،

فایتون سوز، آینالی آتلارا باغلانیب

دولانباجلاردا دولاندیریلسین!

قیزدیرمالی، تانری سیز، سس سیز  گئجه لریم...

دیلیمده دولاشیق دوشن سؤزوم: «آل تبیمی تبریزیم!»

گؤزلریم باغیریر: یالان روایت دیر

تب تؤکن دئییل،

"ازت" دور، دوندوروکن دری نی

قاینادیر قانی تبریز!

 ازت: بیر تور گاز دیر. مایع شکیلینه چئوریلمیشی دری(پوست) بخش لرینده زیگیل و میخچانی ازت واسیطه سی ایله دوندوروب آرادان آپارارلار.  

تاسف له پرفسور دکتر محمد علی فرزانه نین حایات یولداشی اختر خانیم بدوستانی دونیاسینی دئییشدی.آذربایجان ادبیاتینا و اختر خانیم کیمی ادبیاتا آرخا دوران اینسانلارا باش ساغلیغی دیله ییرم.

****

ادبی خبر

ایشیق: ادبیات و اینجه صنعت سایتی؛ تیکله یین لوطفن

آذربایجان مدرن شعر گئجه سینده ادبی خبر

ندن یازیم؟

"خیال اوغلو"نون "نالان سیزلاماسیندان؛

یوخسا "ناظیم" ده­ ده­ نین "اؤزلمی بوراخ " باغچاسیندان­می؟

سیزین یئرلرده­ کی آی- اولدوزدان

یوخسا بیزیم گؤی­لرده­ کی گئجه­ دن می؟

سؤیله!

"آتیلا"نین  "من سنه مجبورام "یندان یازیم...

سریلمیشم سرگی­دن آلمیش کیتابلارین حبیس­خاناسینا

باااااخ...!

"ریتسوس"ون ماوی قادینی بئله

دنیز گؤوده­ سی ایله سؤندوره بیلمیر

"خاچ گؤزلینین" آلوولانان تیلیسیم­لی گلینلیینی

کرمین کؤکسونده،

ساچلاریندا قیوریلان آتش چیچکلرینی...

منسه،

بارماقلاریمین اوجوندا گزیشن سازاق

قیروو باغلاییر آغ کاغیذلاریما

دویغولاریم ناپلئون عسگرلری دیر

بوز باغلاییر ماسکووادا...

"مارکز"ین پاییزلانمیش دیکتاتورلارینین گوجونو

ایچیمده توپلاییرام ، اؤزومو گولله­ له­ ییم

یووووو...

گل سن تتیکی چک!

آغلامارام

دیشلریم پیچاقلایار دوداقلاریمی

آاااااااخ بئله دئمه­ رم

داماریم قانایار داماریمین ایچینه

سئوگی ایلیشر ایلییمه....

خیال اوغلو،ناظیم حکمت،آتیلا ایلهان: تورکیه شاعیرلری

ریتسوس: یونان شاعیری. ماوی قادین آدینا بیر شعرینه ایشاره

خاچ گؤزه­لی:کیان خیاوین اصلی-کرم شعرینده اصلی­یه ایشاره

مارکز:قابریل قارسیا مارکزلاتین امریکالی یازیچی

" یاسلی ساوالان" شاعیری عباس بارز دونیاسینی دئییشدی. آذربایجان ادبیاتینین باشی ساغ اولسون.

تبریز یاشیندادیر عوصیانلار، جزالار و سئوگی لر

ارگ بویوندادیر دونیانین دایاناقلاری

دادیزدیریر آجی چایینی

قارا ساچلاریم کیمی روزگارین  اوزون- اوزانان آجیلاری...

یالنیزلیق،

سهندین کیپریکلریندن چکیلن

دورسوز- دوراقسیز هاوایولو

پامبیق، یوموشاجیق بولودلاری

اوچوردور ساوالانین قارلی زیروه سینه.

۹۰/۸/۴ 

چیلیس: مولییر اثری ، اولکر اوجقارین فرانسادان تورکجه یه چئوریسی ایله

۱۴-۲۷ آبان هر گون ساعات ۶ -تبریزین تئاتر ائوینده

اولکر اوجقارا بو گؤزل ایشی تبریک دئییه رک ،اونا بؤیوک نائلیت آرزوسوایلا

 صبیرسیز بو اثرین اجراسینی گؤزله ییرم .